Aizawl 15th June, 2024 (Sat):  Vawiin hian Kelkang khua chuan Adviser to Chief Minister (Finance & Planning) TBC Lalvenchhunga, MLA hovin YMA Day an hmang.

Khuallian TBC Lalvenchhunga, Adviser to CM (Finance & Planning) chuan kalkhawmte YMA Day chibai bukin, ngaihhlut tur dik tak ngaihhlut leh ngaihsan tur dik tak ngaihsan nachang kan hriat deuh deuh a pawimawh thu a sawi a. Kut tling lova sum la leh hlepru thinte dinhmun thaa dah an ni leh ngaihsan an hlawh thin chu sim a tul thu sawiin, YMA member leh zoram mipuite chu hlemhletna leh ruihhlo do kawnga tan la theuh tura a chah bakah nuam tih zawngte pela pen chhuak ngam turin a fuih bawk a.

 Ruihhloin thalaite a ei chhiatzia leh tanlak a ngaihzia tarlangin, zoram mipuite chu theihtawp chhuaha ruihhlo do chhunzawm zel tur leh sawrkar hmalaknate tha taka thlawp tlat turtein a sawm nghal bawk. 

Kelkang khuaa YMA Day lawmna hun hi H. Vanlalrimawia, President, Kelkang Branch YMA chuan kaihruaiin Rosangzuala, Secretary-in inlawmna thu a sawi a. Kumpuan thupui ‘Ram leh hnam humhalh’ tih chu T. Lalhipliana'n a sawifiah a. YMA thuthlung sawiho niin, hlado chhama intihsiak a ni a. He hunah hian Kelkang khawtlang chuan an khawchhuak TBC Lalvenchhunga chawimawina hun an hmang bawk. 

YMA Day 2024 pual hian Kelkang Branch YMA chuan programme hrang hrang a siam a. Nizan atangin intihsiakna chi hrang hrang 21 lai mai hmanga inel a ni a, zanin hian intihsiakna neih chhunzawm leh tur niin, result puan leh YMA Day kharna inkhawm neih a ni ang.